Comune di Talmassons

Cheste antighe famee furlane e je stade ogjet di cetancj studis, soredut a partî dal Sîscent. Lis sôs origjins a restin dut câs inmò discognossudis. Cirint di contâ in struc il svilup des lidrîs di cheste famee, al è di dî che cualchi arbul gjenealogjic le fâs rivâ di un ciert Pietro, che tal 921 al ve dal patriarcje Berengario la autorizazion a fâ sù un cjistiel a Savorgnan. Une linie dissendente pôc sigure e rive po a Corrado, al fi Rodolfo tal 1219 e ai fîs di chest ultin Corrado e l’omonim Rodolfo tal 1257. Al è propit su chest periodi che i parês no son dacuardi e soredut su la origjin di Federico di Colmalisio, che par cualchidun al jere fi di tâl Odorico, par altris di Corrado e duncje fradi di Rodolfo, par altris inmò di Rodolfo e duncje fradi di Rodolfo.
Al fo propit chest Federico che tal 1238 al tacà une serie di operazions a caratar fondiari, che tal arc di doi decenis a vevin di puartâlu ae acuisizion di cetancj bens in Friûl oltri che, ce che al è plui impuartant, te stesse Udin. Lis notiziis dal Cinccent a fasin po tornâ indaûr propit a chel periodi la salide de famee ae nobiltât udinese, il so ingrès tal parlament de Patrie e la acuisizion in feut dal cjistiel di Savorgnan. Pal sigûr, i prins a jessi clamâts in maniere definitive “di Savorgnan” a forin i nevôts di Federico, viers la fin dal XIII secul, impen altris dissendents si clamarin “di Udin” e a pierderin subit impuartance.

La formazion de contee di Belgrât e tacà cu la costruzion dal cjistiel omonim, forsit viers il IX o X secul: lu cjatìn tal 1001 tra i bens donâts dal imperadôr Ottone III al patriarcje Giovanni IV, donazion confermade tal 1028 dal imperadôr Corrado. Tal 1184 al è tra i possès dal vescul di Concuardie, impen tal 1254 al è feut di une dinastie locâl che midiant Diomunda, fie di Azzo di Belgrât, dade come nuvice al cont Alberto II di Gurize, si parintà cun cheste famee impuartante. Il feut al jentrà cussì tra chei dai conts di Gurize.
Intant i Savorgnan a vevin za pandude la lôr influence in cheste zone: a vevin di fat otignût in feut il cjistiel di Flambri inferiôr (Cjistielut) e anzit ai 5 di Lui dal 1258 i fradis Corrado e Rodolfo Savorgnan a tornarin il cjistiel stes al patriarcje Gregorio di Montelongo, a front di un paiament di dusinte marchis. Tal stes periodi la vile di Flambri (superiôr) e fo concedude in feut di abitance a Rapotisso di Pucinie e Marquarduzio di Ruvigne: al jere l’an 1263.
Ai prins dal secul dopo il cjistiel di Flambri inferiôr al jere za rivât ai conts di Gurize, che di fat ai 11 di Març dal 1313 lu derin in feut a Febo e Raimondo della Torre, obleant lôr e i lôr sucessôrs a servî il lôr princip, in câs di vuere, garantint la difese dal teritori tra il Tiliment e il Lusinç.
No si tratave dome dal cjistiel ma di une jurisdizion che e cjapave dentri cualchi vile come Riverote, Talmassons e Gnespolêt. Tal 1346 (o forsit tal 1348), par cause di barufis fra i Del Torre e i Savorgnan, il cjistiel al fo sdrumât e doi agns dopo (ai 25 di Zenâr dal 1348) un grant taramot al finì di butâlu jù: chescj a forin forsit i motîfs che a puartarin il paîs a pierdi impuartance a pro di Flambri, che za al jere sede de famose plêf. Lant indevant tes barufis che si diseve prime i Savorgnan a butarin jù ancje la cortine di Flambri: chest al sucedè ai 27 di Mai dal 1350, pôcs dîs dopo che lis trupis di Udin a vevin gjavât di man il paîs ai gurizans.
Intant si presentavin lis cundizions pe costituzion di une gastaldie a Flambri superiôr. La prime notizie e je dai 21 di Març dal 1299, cuant che o savìn che un ciert Folcherio di Walsperch e tâl Pacio di Flambro a jerin gastalts par cont di Enrico di Gurize. Une notizie compagne si le torne a cjatâ cualchi an dopo: ai 19 di Avrîl dal 1305 al jere gastalt Carsimano di Gurize. Ciert al è che a metât dal secul XIV la gastaldie di Flambri e jere za stade costituide; cheste di fat, insiemi al cjistiel di Belgrât, e jere stade dade in ipoteche di Mainardo di Gurize a Castrone de’ Bardis, banchîr tal 1344. Pôcs agns dopo, tal 1354, Cjistielut al jere di sigûr tes mans dai conts di Gurize, come che al risulte di un at, cun date ai 7 di Març, dulà che i abitants a zurarin fedeltât al cont Mainardo VII. Ma i doi teritoris, ancje se a jerin dongje, a restarin aministrativementri dividûts, cemût che si viôt tal 1363 cuant che Mainardo al confermà la signorie di Cjistielut a Febo della Torre e al ve di Enrico (simpri di Gurize) chê di Flambri.
La gastaldie di Flambri no cjapave dentri il paîs di S. Vidot. Chest al è clâr par vie che tal 1320 Enrico di Gurize al invistì Enrico di Prampero de avocazie di Listize e S. Vidot. Chest paîs al jentrà sot de influence di Flambri dome dopo des invasions dai Turcs te seconde metât dal XV secul e la avocazie che si diseve prime e spieghe il parcè che il paîs, come che si viôt in chest test, al restà leât a Listize.
Par almancul un secul il cjistiel di Belgrât e la gastaldie di Flambri a restarin tes mans dai conts di Gurize. La colade dal stât patriarcjin nol cambiâ la situazion par vie che la Serenissima e confermà chei possediments ai conts di Gurize. Anzit al è di tignî cont che propit cheste particolaritât (i possediments gurizans in tiere venite) e determinà doi events fondamentâi par chescj teritoris: di une bande la compenetrazion de gastaldie di Flambri te contee di Belgrât, di chê altre la acuisizion di chei privileçs che po a determinarin la separazion di fat de Patrie dal Friûl. Tal disfâsi dal stât furlan, tal 1420, la contee di Belgrât e jere dut câs aromai formade, cussì come che po e passà ai Savorgnan.
Par chel che al inten lis carateristichis privilegjadis de contee di Belgrât, chês a forin determinadis intune convenzion dai 11 di Avrîl dal 1434 stipulade tra il stât venit e i conts di Gurize e confermade in ats dal 1435, 1439 e 1468. La definizion de formazion de contee e des sôs carateristichis nus permetin cumò di passâ parsore su lis vicendis de seconde metât dal secul XV, che a vioderin il feut passâ tra lis mans de contesse di Cilli, di Massimiliano I di Asburc e di Federico di Sassonie. Lis vicendis de vuere scombatude tra venezians e austriacs al inizi dal secul sucessîf a puartarin la popolazion dal puest a zurâ fedeltât ae Serenissima ai 11 di Avrîl dal 1508. Di chel moment e par trê secui il feut al restà tes mans de Serenissima Republiche di Vignesie.

** Par un aprofondiment sui rams de famee Savorgnan, viôt la opare citade.
La Contee di Belgrât e la sô influence su Flambri.
Di “Flambri” – E. Dentesano e M. Salvalaggio

Tal 1596 il Tiliment, che al coreve a pocje distance dal abitât di Belgrât, al vignì fûr dal so jet e al devastà i cjistiei di Vildivar disot e disore e chel di Madrîs. Ancje la vile di Belgrât e subì grandis devastazions. Tal secul sucessîf lis esondazions dal flum si ripeterin dispès e chest al obleà i Savorgnan a lassâ par simpri il cjistiel di Belgrât tal 1692. Une di chestis esondazions e cjapà soredut il patrimoni archivistic de cancelarie di Belgrât tal 1638, dispierdintlu o dut câs ruvinantlu in maniere grave.
Si decidè di trasferî la sede de cancelarie a Bertiûl. Li a rivarin ducj i documents produsûts de cancelarie de contee di Belgrât e salvâts de distruzion: si tratave di 250 filzis. Po dopo, tra il 1754 e il 1757, la cancelarie e fo trasferide a Flambri, te vile de famee e di chel moment la sede e restà te nestre vile fint che i bens a passarin ai Moro, duncje almancul fint al 1809.
Ae fin dal Sietcent a Flambri al viveve in maniere permanente un agjent, che al jere il plui impuartant no dome de contee di Belgrât, ma di dutis lis jurisdizions dai Savorgnan in Friûl; a lui si riferivin di fat i agjents minôrs de contee di Belgrât e ducj chei altris, di Osôf ai Fors Savorgnans, di Cjavrîs a Cussignà, di Martignà a Lestans. Chest agjent al jere in corispondence ogni dì cul cont Mario, che al jere a Vignesie par riferîi dal andament de aministrazion dai siei bens dal Friûl. Al furnive cun di plui la residence venete di provisions e al inviave documents aministratîfs, libris e ogni altre robe che e podès coventâ.
L’agjent di Flambri al jere il plui vieli e, come che si diseve, al coordenave la ativitât di chei altris agjents, sparniçâts par dut il Friûl. Al faseve di colegament tra lôr e il cont che al jere a Vignesie. Lis spedizions di mangjative, documents o altri materiâl a jerin cuasi cuotidianis: la vile di Flambri e faseve di centri di racuelte par dutis lis jurisdizions furlanis e di culì i traspuarts si fasevin, midiant caretîrs dal puest, fint ai puarts di Tisane o Puart, di dulà che dopo par mâr a rivavin fint a Vignesie. Ae fin dal Sietcent, almancul dal 1778 al 1798, o cjatìn cun cheste cjarie un ciert Biasioni, che nus à lassât cetancj rindiconts de sô ativitât e de vite di chê volte, comprendude une descrizion dai fats sucedûts dilunc de invasion di Napoleon.

**Par un aprofondiment sui rams de famee Savorgnan, viôt la opare citade.

1. Girolamo Savorgnan, plevan.

Girolamo al nassè ai 2 di Setembar dal 1523 e al fo il 19m fi dal omonim Savorgnan, che al veve vût il titul di Cont di Belgrât; al jere ancje l’otâf fi vût de cuarte femine di chel, Orsina Canal, femine nobile venete e il secont cul non compagn. Ai 14 di Avost dal 1536, di a pene tredis agns, al fo invistît dal plevanât di Flambri e, no cate lis contestazions dal patriarcje di Aquilee, al rivà a vê il benefici e lu doprâ fint che al murì. Di zovin al fo inviât ae cariere eclesiastiche. Lu cjatìn cussì cleric in Friûl e duncje student a Padue, dulà che si laureà. Tornât in Friûl al fo nomenât Canonic de glesie metropolitane di Udin. Duncje al le a Rome, clamât dal gardenâl Gian Francesco Comendone, so ex compagn di studis, dulà che al cognossè i papis Paolo III, Giulio III e Paolo IV.
Tal 1555, savût de muart dal fradi Germanico, al tornà in Friûl tal cjistiel di Belgrât e al restà li fint al an dopo. Chi, forsit, meditant su la muart dal fradi, al decidè di fâ testament: a jerin ai 4 di Setembar dal 1555. Al tornà duncje a Rome e tal 1557 pape Paolo IV lu nomenà vescul di Sebenico. Prime di lâ te diocesi di chê citât al tornà a passâ in Friûl, dulà che al scrivè lis procuris pai fradis pe aministrazion dai siei bens. Dal 1561 al 1564 al fo pal sigûr a Trent, partecipant in maniere ative al famôs concili, dopo che al fo tornât a convocâ tal 1560. Determinât a puartâ lis riformis racomandadis tal concili ancje te sô diocesi, al cjatà cetantis dificoltâts fint al 1573.
In chel an di fat, stuf de situazion che si jere creade, al molà il vescovât e si ritirà in Friûl, dulà che al restà cualchi an, vivint in diviersis bandis, come che si pues viodi tes letaris che al scriveve al nevôt Giulio tra il 1576 e il 1581. In chel an i sucedè une altre disgracie: il fradi plui zovin, Ascanio, al fo copât dal nevôt Germanico, fi di Marc’Antonio, par cuistions ereditariis. Par chest fat Germanico al fo bandît de Republiche, impen Ascanio al lassà il fi Girolamo di picinin. Il nestri si ocupà de division ereditarie, che cualchi barufe e puartà indevant par plui di doi agns. Intant il nevôt Giulio al murì a Rome; chest al jere camarîr segret li dal pape e al stave daûr ai afârs dal barbe in chê citât. Il brut fat lu sburtà a lâ a Rome e di fat lu cjatìn là tal 1584. L’an dopo al jere di gnûf in Friûl, dulà che al viodè dai siei bens in Cjargne. Tornât a Rome tal 1586 al restà, simpri plui malât, fint ae sô muart, ai 8 di Mai dal 1591. Ai 7 di Març dal an prime, sintint che al stave par murî, al veve fat testament, scancelant chel dal 1555. Al fo soterât tal ospedâl di S. Giacomo degli incurabili.

2. Francesco Girelli-Savorgnan, plevan.

Ae fin dal XVIII secul a jerin vîfs cuatri fradis de linie del Torre. Doi di chei, Antonio e Girolamo,  a vevin vût de Serenissima la invistidure che prime e jere stade dai del Monte. La linie di Giacomo si fermà par vie che al ve cuatri fiis feminis. Un cuart fradi, Francesco, che al stave par maridâ une sûr de femine di Giacomo, al ve un fi di jê, ma al murì prime che al nassès, tal mês di Otubar dal 1788 a Bibano. Al frut al fo imponût il non di Francesco; il cognon, Girelli, lu cjapà de mari Elena e ducj i doi a forin cjapâts in cure prime di Girolamo e dopo di Antonio, cuant che tal 1790 al murì Giacomo. Intant i doi fradis nomenâts a ricognosserin Francesco come fi naturâl dal muart omonim e cussì si capìs il parcè dal dopli cognon.

Dopo la muart di Girolamo dut il patrimoni, libar ancje se feudâl, al passà tes mans di Antonio. Al è di dî, par sclarî, che Antonio si cjapà la cure dal nevôt Francesco ancje par vie che lis leçs venitis a previodevin che il fi naturâl al ereditàs la dodicesime part de facoltât libare dal pari. Tal 1799, muart il plevan di Flambri Giacomo Savorgnan, il cont Antonio al proponè ae curie la nomine dal frut Francesco, che a chel pe ocasion a jerin stâts dâts i ordins minôrs. Cussì Antonio al podè, midiant l'afituari don Stella cjapâ, in non di Francesc, i cuartês di dute la plêf di Flambri e, par cuintri, al continuà a paiâ ogni mês 132 liris talianis a Elena Girelli pal mantigniment sô e di so fi. Cheste situazion e durà fint a dut il 1806. L’an dopo il Girelli, fat 18 agns, al rivà ae maiôr etât a norme des leçs venitis che a jerin inmò in vore e duncje il cont Antonio al bandonà la tutele dal nevôt, lassantje dome lis renditis abaziâls.
Cuintri di cheste decision il Girelli al fasè ricors par viis legâls, domandant che i vignìs tornade di bande dal barbe la dodicesime part dai bens libars dal pari e il paiament dal assegn ae mari fint al moment di tâl restituzion; al domandà ancje che i fossin tornadis lis renditis abaziâls, cjapadis dal barbe tra il 1799 e il 1806. La barufe no jere inmò sistemade, fint che tal 1809 il cont Antonio al de dutis lis sôs possidencis, libaris e feudâls, a Antonio Moro e tal an dopo al murì cence fîs. Al fo cussì che lis causis si trasferirin al Moro. A vignirin daûr sentencis tal 1813 e ai 7 di Jugn dal 1815; duncje une transazion tra lis parts, dulà che il Moro si impegnave a paiâ al Girelli 26.000 liris talianis a titul di licuidazion de sô pension alimentâr e des renditis abaziâls che non veve cjapât tra il 1799 e il 1806, e someà meti fin ae rivalitât. E restave in pîts di fat dome la cuistion de determinazion dal valôr des sostancis libaris dal marchês Francesco Savorgnan, che e coventave par cuantificâ la dodicesime part che i tocjave al Girelli.
Stant che il Moro nol rispietà i pats dal 1815, il Girelli al fo costret a cjapâ di gnûf lis viis judiziariis par rivalêsi. Si rivà duncje a un gnûf acuardi che al fo firmât ai 30 di Setembar dal 1820 e a un altri, cun date ai 21 di Novembar dal 1820; acuardis che il Moro, come il precedent, nol onorà. Diviers tribunâi a diserin plui voltis al Moro di dâi al Girelli ce che i spietave ma chel si liberà de proprietât midiant volturis di comut e cussì il Girelli, no cate che al ves de sô diviersis sentencis, al restà simpri insodisfat e al murì tal 1834 cence mai vê la sô robe. Al fo soterât tal cimitieri di Çuian ai 15 di Març, doi dîs dopo de sô muart in cjase Moro, come che si pues lei tal Catapano, ai 13 di Març.