Toponims
Presincis romanis tal teritori dal Medi Friûl, par cure di T. Cividini e P. Maggi
Il teritori dai doi comuns di Mortean e Talmassons al è discriminât une vore de virtuâl “linie des risultivis”, che e cor di est a ovest e che e pues jessi identificade plui o mancul cu la Stradalte. Lis motivazions gjeologjichis che a àn determinât cheste diviersitât a son cognossudis e a son ilustradis in maniere esaustive in studis specifics, motivazions nomenadis e tornadis a doprâ po tes monografiis locâls. Nô duncje o tornìn a cjapâlis, ancje parcè che pai nestris fins al è plui interessant analizâ lis consecuencis determinadis de divierse nature gjeologjiche che e diferenzie la part setentrionâl di chê meridionâl.
Lant de bande nord (Mortean) viers sud (Talmassons) si note un evident mudament te granulometrie dal teren, fenomen che al permet la infiltrazion des aghis meteorichis te part superiôr; in chê inferiôr, impen, il strât di arzile al impedìs il passaç des aghis di falde e al fâs sì che e torni sù, determinant une idrografie in superficie plui siore. Eco parcè che a nord de linie des risultivis a son tancj nons come Arnacis (dal latin “arenaceus”, arenôs) a Mortean, Gjàris (di “gjare”, glerie) a Lavarian, Grolis (di “groba” o di “grave”) inmò a Lavarian, Masarotis (di “maserie”, grum di claps gjavâts fûr dai cjamps e ingrumâts intun font pustot) inmò a Lavarian, Savalons a S. Andrât, etc.
A sud o cjatìn invezit Mezzoi e Mevol (“tal mieç des olis”), il prin a Flambri e distintementri a Talmassons, il secont a Flumignan; Prât des Olis a S. Andrât; Laval (“la val”, dal significât clâr) a S. Andrât e Vals a Flambri; Roie Macilar e Macilute a Flumignan e Macile a S. Andrât, che a ricuardin la esistence di masars, a testemonein la grande presince di aghe; Lamaruz (diminutîf di Lama/Lamar, “teren paludan”, “poce”) a S. Andrât, etc.
I idronims po a son, tra i toponims, chei che si mantegnin plui a lunc e a ‘nt cjatìn une vore tal teritori di Talmassons ancje se, par dî il vêr, pôcs a son chei antîcs: il plui interessant par chest studi al è di sigûr Roggia di Cusana, che forsit al è daûr di un prediâl roman, cun ae fonde il non personâl Cusius, come tal câs di Cusan, frazion di Çopule: al sarès, in sostance, un toponim derivât di un prediâl vêr e propri (*Cusanum/a).
Tal teritori di Mortean o cjatìn dome il Cormôr, che al è forsit il plui antîc idronim de zone, cu la sô base *kar (“piere”) di sigûr prelatine, ma che in cheste zone e je di considerâ toponim di ripuart.
Ancje lis carateristichis pedologjichis a son une vore diferentis par vie de divierse struture dal teren e chest al à determinât, di consecuence, une fertilitât dal teren plui alte propit a cjaval de za nomenade “linie des risultivis”.
Propit li a son vignûts sù i abitâts – nol è un câs, si à di tignî a ments – di S. Andrât, Flumignan, Talmassons e Flambri.
Flumignan in particolâr, al è di sigûr un prediâl roman (Fluminianum), basât sul non Fluminius. Cualchi dubi invezit al ven par Talmassons, che al podarès vignì di un non personâl roman, ma che al à inmò cualchi dificoltât etimologjiche. I riscuintris no son frecuents: si nomene “Ponte Talmassòn” e “Talmassòn” a Fontanefrede, “Talmasso(n)” a Brugnera e “Rio Talmàss” a Atimis. La presince di chestis vilis te fasse plui fertile dal teritori e à vût come consecuence un disvilup des lôr pertinencis in sens latitudinâl, cuntune lungjece di 7-10 km e une largjece di 1-2 km; chest al è dât de necessitât di une ripartizion teritoriâl ecue cu la vile a confin e di une diversificazion de racuelte tra i prodots dai terens secs dal nord e chei garantîts dai terens paludans dal sud.
Ve che alore o cjatìn a nord nons come Magrêt a Flambri, il cuasi omonim Magrêts a Talmassons e Campardo (“Campus aridus”?) a Mortean, impen a val a son tancj Bosc, Bus, Boscat, ducj cul stes, evident significât.
Tornant ae distribuzion dai abitâts, o viodìn che parsore de Stradalte e je plui omogjeneitât; cheste e je la consecuence di une sostanziâl compatece dal teritori di ogni singule vile. Stant che no esist chi la fuarte diversificazion gjeo-pedologjiche che si cjate pôc plui a sud, no si è sintude la necessitât di diferenziâ lis racueltis e duncje i teritoris no si son disvilupâts di nord a sud.
Lis stessis osservazions si puedin fâ sui rescj de centuriazion dal agri aquileiês. A nord de Stradalte, di fat, olmis evidentis di cardins e decumans si son mantignudis e si puedin viodi plui o mancul tal orientament de rêt stradâl atuâl; plui ben si puedin aciertâ cuntun studi cartografic precîs.
Culì si è duncje disvilupât il paîs di Mortean, non che al ven di sigûr di un prediâl antîc (Mortelianum), su la fonde dal gjentilizi roman Murtelius; nol è un toponim frecuent, ma si lu cjate in “Morteano” (Remanzâs) e in “Mortigliano” (Livorno). La presince dal paîs e à po gjenerât cetantis Viis di Mortean, cualchidune sul teritori in ogjet di studi, come a Lavarian, S. Andrât, Flumignan, Talmassons; ma ancje Palût di Mortean (a S. Andrât) e Roggia Morteana; al è forsit in plui dî che par chescj ultins no si pues fevelâ di toponims romans.
Un altri prediâl impuartant di cheste aree al è Lavarian (*Laberianum), o ben il mâs di Laberius, che forsit si pues confrontâ cun “Laverane/Leverano” (Nimis) e cun “Lavaiano” (Pisa). O cjatìn ancje, tal confin cun Listize, Pantian e Pantian disore, forsit dal non Pantilius midiant un “praedium Pantilianum”; che al à za gjenerât “Pantianins/Pantianicco”; chel, avonde dongje, al à però un sufìs celtic, il nestri al è cun sufìs latin.