Comune di Talmassons

Lis cundizions dai terens, la flore e la faune

Te piçule part di teritori che e je te alte planure no si cjatin aghis superficiâls e chest al puarte a une fuarte ariditât. Chel teritori al è di fat masse a nord par dâ origjin a aghis di risultive e masse a sud, duncje lontan des culinis, par cjapâ cualchi lavie. La situazion e je ingriviade de alte permeabilitât dal teren, che al à produsût, vie pai milenis, une decalcificazion costante, par vie de aghe ploiane e une consecuente feretizazion: il colôr ros di chescj terens al ven propit di chest fenomen.

La irigazion e je culì une cundizion essenziâl pe produzion agrarie. I implants di irigazion, fats tai agns Cincuante e Sessante, a son poçs par prelevâ aghe te falde freatiche e canaletis che a rivin in ogni teren.

La plui part dai terens, stant che a son sot de linie di risultive, a son però di nature diferente. Suntune fonde di glerie, di origjin plui antighe, si cjate un strât plui o mancul penç di dipuesits plui fins; chest strât al è dut câs dificil che al sedi mancul di 30 centimetris e al pues rivâ in cualchi zone a doi metris. A son pal solit arzilis, cun zonis di dipuesits di savalon e lim. Tes areis inmò paludanis de part basse dal teritori si cjatin invezit terens torbôs, gjenerâts soredut di un procès derivât de presince di vegjetazion e aghe ferme.

Flore – La vegjetazion naturâl dal teritori si diferenzie tra la part a sud de linie di risultive e la minime part che e reste. A sud, in origjin, al esisteve un bosc di latifoliis mesofilis, costituide pal plui di rôi (Quercus robur) e di altris speciis adatis al clime, come il faiâr, il frassin, l’olnâr, il vencjâr, l’olm, il cjarpin, etc. Dongje di cheste a son cetantis speciis di arbossits. Cheste vegjetazion e je inmò presinte in cualchi aree che par fortune e à mantignût l’aspiet origjinâl. Chest al vâl ancje pal strât di jerbe, costituît dal prât di palût e componût di cirche 80 speciis, diviersis tipichis de zone di risultive. Si trate di residuis des epochis glaciâls come la rare “Brassica palustris”, il zi faraon (Hemerocallis lilioasphodelus), la “Primula farinosa” (marculine) e altris: chestis speciis a son tipichis des zonis di mont, plui altis o dut câs a latitudins superiôrs. Chestis si puedin cjatâ in planure dome te zone di risultive e la lôr difusion e je garantide de ecezionalitât climatiche sigurade des aghis di risultive, che a vegnin fûr ae temperadure medie di 13,5°C, cun escursion termiche cuasi assente.

Par fortune, come che a disevin, cualchi aree naturâl e je stade salvade di un procès insensât di bonifiche integrâl, che al riscjave di savoltâ dut il teritori. In gracie di une atente e costante opare di cualchi apassionât si è inviât un procès di costituzion di un parc naturâl, su terens di proprietât regjonâl, che al varès di evitâ intervents irazionâi.

Si met in cognossince une note, gjavade fûr dal “Libri storic”, che al dîs cun trope sensibilitât che il predi al stes daûr a la cuistion.

“Zenâr: vuere aes plantis! Par dî il vêr si scuen dî che lis plantis a stan deventant nemiis dai oms (almancul in cheste zone!).

In dute la zone tor ator dal paîs si viôt a gjavâ fûr plantis di dutis lis dimensions e speciis cence pietât e cence un pôc di judizi. Si tain plantis grandis (come il rôl) dome parcè che a fasin un pocje di ombrene te blave, si tain lis cisis che a delimitin i nestris cjamps par aumentâ il podê di un agâr. Si vuelin slargjâ i cjamps come une bisteche batude dal martiel di len. Al baste aumentâ la racuelte, magari di pôc. L’ambient naturâl dulà che o vivìn nol interesse plui.

Cheste mentalitât vandaliche e fo puartade ancje te zone ovest dal paîs (“Megiôi”), zone che e conservave inmò i siei boscs cuasi intîrs e i siei cors di aghe inmò naturâi. Za tal ’19 interès privâts a vevin creât in chel puest, dongje dal mulin Magrini, vascjis grandononis pal arlevament di trotis puartant culì lis aghis di risultive de zone, cuntun grant dam ecologjic. Ae fin a rivarin i contadins a scomençâ la “bonifiche”; doprant grandis machinis par nivelâ, gjavâ fûr, creâ gnûfs canâi pe aghe e po il fûc par distruzi cisis lungjonis.

Par ultime e rivà la Regjon Autonome cul intent di fâ il “Parc des Risultivis”. La zone e fo blocade e il Sindic cun manifest al visà la citadinance. In chê ocasion si vioderin, suntun platin al inizi de vie clamade “La Grande” e suntun pôl al inizi de piçule vie viers il mulin Magrini, dôs tabelis cu la scrite: “Regjon Autonome Friûl Vignesie Julie – Comun di Talmassons – Zone des risultivis – Zone sot il vincul e tutele naturâl e ambientâl”.

Il fat al maraveà i proprietaris dai fonts di chê zone e, impen di fermâ la distruzion, la aumentà prime in maniere incierte e po in mût plui consistent. Il bloc al jere soredut par no fâ nissune modifiche al teren e par no taiâ lis plantis grandis.

I plui coragjôs a scomençarin a no rispietâ la proibizion. L’intervent regjonâl (o miôr la fente di intervent) al fo râr e inciert e chest al animà chei altris distrutôrs che a ciririn di dâsi da fâ. E cussì si stave creant… il Parc des Risultivis”.

Te part di teritori parsore de linie di risultive, lis cundizions pedologjichis a determinavin une fuarte ariditât dal teren e cussì ancje la presince di vegjetazion tipiche dal magrêt. E je une magle spontanie, fate soredut di arbossits che si adatin a chês cundizions, come il frassin e il cjarpin neri. E je dut câs une vegjetazion pôc evolude par vie des cundizions ambientâls dificilis.

Faune – La faune dal teritori no si slontane di chê dal rest de basse planure furlane. Ancje chi, al è clâr, si diferenzie in maniere sensibile tra zone alte e basse dal teritori.

A son presintis dutis lis speciis di pes, insets, retii, uciei e mamifars de plane. Tra i uciei si notin ancje speciis migratoriis come rassis e ocjis, oltri a fasans e a tantis speciis di passars, roseadôrs, etc. In Invier si notin dispès grancj scjaps di corvats.

Tra i mamifars, oltri al jeur, a tantis speciis di roseadôrs, a insetivars come il riç e il farc e a carnivars come la faìne e la bilite, si è viodude ancje la presince di cjavrûi, cualchidun copât dai braconîrs. La plui part des bestiis salvadiis e cjate il so habitat tai boscs e palûts de zone sud.

Simpri dal libri storic si lei une note che e ven subit dopo:

“Nol baste… ma a dute la nature! Par dî il vêr nancje i uciei, chei pôcs che si viodevin, a stavin in pâs.

Si cjaçave e no dome in maniere legâl: cun rêts, tramais, etc. Si viodevin adiriture oms a robâ i piçui tai nîts o copâ i mierlis in Invier intant che al neveave. Dai pes si pues dî ancjetant. La pescje si faseve ancje eletrichementri… un pescjadôr di sfrôs des bandis di Rivignan al murì sfulminât di une scjarie eletriche pescjant in cheste maniere. Par no fevelâ po dai varis incuinaments. L’om cussì malcuiet al someave scjariâ lis tensions ingrumadis tal so vivi…”