Storie
Il non al ven di “mans”, i grancj terens che i consui romans a davin ai soldâts plui valorôs. Forsit un di chescj al jere Flaminus, e di chi Flumignan (forsit il stes Caio Flaminius, gjenerâl, tribun de plebe tal 232 a.C. e consul 9 agns dopo) ancje se in tancj a crodin ae derivazion di flumen, stant che pôc lontan al passe il Cormôr.
“Intal mans” dut câs, al à di sedi stât ripetût cetantis voltis, tant che, pôc ae volte, ducj a àn scomençât a clamâ Talmassons chel paîs vignût sù intune zone prolifiche, siore di aghe e dongje di une vie antighe come la Stradalte, pavimentade dai Romans cul non di vie Postumie. Dilunc de strade a son stadis scuviertis dôs necropolis, une a incinerazion e une a inumazion, intant che un piçul insediament al è vignût fûr dongje de gleseute cimiteriâl di San Silviestri.
Bondance di aghe, si diseve, cun di fat a Flambri al nas il Stele e za chest al mostre la impuartance de tierce frazion, la plui impuartante storichementri, tant che e metarà in ombre fin dal inizi chel che daspò al diventarà il cjâf lûc. Par vie che di “Plebs Flambri” si fevele fint dal 1126 intun diplome dal Cjapitul di Aquilee e al torne a comparî tal 1258 cuant che Corrado e Rodolfo di Savorgnan a trasferissin al patriarcje Gregorio di Montelongo il cjistiel di Flambri e la vile d’Isernic, chel che cumò al è Flambruç tal comun di Rivignan. Flambri e jere une “plêf matriç”, o ben e veve il dirit di creânt di gnovis tes tieris di colonizâ, forsit chês a nord de linie des risultivis.
Talmassons, come Bertiûl, al jere sot di chê plêf e al podè distacâsi dome tal 1339, cuant che il paîs al fo dât a Corardo Bojani, nobil di Cividât. Al jere Flambri duncje che al comandave e al viveve protezût di une “cortine” dongje de glesie di Sante Marie anunziade fint al 1346 cuant che e fo sdrumade, invezit Talmassons, come ducj i paîs de zone, al fo vitime des invasions turchis; la plui grivie e fo chê dal 1477 che e scancelà par simpri l’abitât di Sanvidot. Al è curiôs ricuardâ che, no cate la distruzion, la comunitât e le indevant fint al 1806 cun assembleis periodichis dai abitants pe aministrazion de glesie di Sant Antoni (che e je inmò) e de confraternite dongje.
La impuartance di Flambri e je inmò testemoneade dai toponims: e je une piçule vie Dolè, te frazion, che e à une grande impuartance storiche. E je la contrazion dal toponim vie d’Aulee, pal sigûr vie Aquilee, o ben la strade che, partint di Flambri, e puartave tal centri plui fuart de epoche romane. Lis vicendis storichis a puartarin a Flambri (che al jere sot il teritori di Belgrât), prime ai patriarcjis di Aquilee, cul at di donazion di pape Alessandri III dal 1174, duncje ae Contee di Gurize tal 1258 fin che la muart cence eredis di Leonart, ultin cont, tal an 1500, al permetè al imperadôr Massimilian de Austrie di cjapânt dentri lis tieris, no cate lis protestis de Republiche Serenissime che intant e veve cjapât il puest dal Patriarcjât. Vignesie e varà di spietâ pôc, il 1512, par vê la contee di Belgrât e duncje ancje Flambri che al vignarà donât ae famee Savorgnan pai servizis dâts in particolâr te difese di Osôf cuintri dal cont Frangipane aleât cu la Austrie.
A Flambri i Savorgnan, oltri a tornâ a fâ sù la cortine di difese sdrumade tal 1346, a trasformin la vile che e je inmò intun lûc di bombâs, deliziis, cunvignis e ghiringhei. Dal so puarton e partìs inmò vuê une strade, ancje se pôc doprade, che e rivave drete fint a Udin. Tal 1797 al ven firmât il tratât di Cjampfuarmit e Talmassons al va sot de Austrie, dulà che al reste fint al 1866 cuant che il teritori al devente talian. L’ultin grant fat storic al ven, inmò a Flambri, ae fin di Otubar dal 1917: par protezi la ritirade des trupis talianis daspò de disfate di Cjaurêt, dongje de glesie di Sant Zuan su la Napoleoniche, si imole un repart intîr di granadîrs di Sardegne comandâts dal colonel Emidio Spinucci, e e je stade dedicade sedi la vie che de glesie e va tal paîs sedi la vecje scuele elementâr.
La ultime domenie di Otubar, ogni an, i granadîrs a fasin culì une cerimonie comemorative. Tai ultins doi secui, gjoldint de trancuilitât, Talmassons al à burît fûr cualchidun dai plui impuartants inzens furlans, comprindûts doi vêrs erois ancje se in cjamps diferents.
Valentino Cossio al fo tra i Mîl daûr di Giuseppe Garibaldi che a lerin di Quarto a Volturno tal 1860, Annibale Frossi al fasè part de scuadre di balon dôs voltis campion dal mont tal 1934 e tal 1938 e al fo cjapitani di chê che e vincè la medaie di aur tes Olimpiadis di Berlin dal 1936. Altris nons a viverin culì: Pacifico Valussi, om di tancj interès, politic, patriot cun Daniele Manin te difese di Vignesie e precursôr dal gjornalisim furlan, pari Cornelio Fabbro, un dai plui impuartants filosofs e teolics dal Nûfcent e, parcè no, ancje Giacomo Bonutti, figure popolâr une vore famose pe sô vivacitât di spirit passât ae storie cul non di Jacum dai Geis.