Notis cronologjichis
Notis storichis cronologjichis dai 24.2.1101 ai 29.7.1866
Chestis notis no àn nissune pretese di sientificitât storiografiche. A vulin jessi dome une vuide e un sunt storic dai fats storics principâi che a àn interessât il nestri Comun di Talmassons.
24.2.1101
Acela e so fì Ugo, di leç bavare e Liuza, femine di Ugo, di leç langobarde par nassite, a donarin al abât Corrado di Sesto in Sylvis diviers imobii a Flambri che a comprendevin cjasis, massariis, vignis, cjamps, prâts, mulins, pascui e boscs.
1126
Secont il Blasich chest al è l’an che e ven nomeade pe prime volte la plêf di Flambri.
1170
Si à notizie di un tâl Enrico di Flambri.
27.4.1174
Cuntune bole buride fûr di Anagni (FR) il pape Alessandro III al confermà al preponût di S.Feliç e Fortunât di Aquilee i siei possès. Tra chescj bens a jerin trê mans a Flambri.
30.7.1180
In cheste date a Rome, ae presince di pape Alessandro III, si rivà a une transazion tra i patriarcjis di Grau e di Aquilee. A pegn de transazion a forin metudis lis plêfs di S. Polo di Piave e di Flambri.
1196
Al è di gnûf nomenât il paîs di Flambri.
1247
Intun famôs elenc di plêfs furlanis, di chel an e ven nomenade la plêf di Flambri, dal arcidiaconât inferiôr. E je la seconde citazion documentade de plêf di Flambri.
5.7.1258
Corrado e Rodolfo, fradis di Savorgnan, a meterin tes mans dal patriarcje di Aquilee, Gregorio di Montelongo, par 200 liris di Piccoli Veneziani, al lôr feut che al cjapave dentri il cjistiel e la vile di Flambri Inferiôr; a rinunziarin ancje a Isernico e al possediment dominicâl di Flambri.
1263
Il Patriarcje Gregorio al de il feut di abitance la Motta superiôr di Flambri a Rapotisso di Pocenie e Marquarduzio di Ruvigne, dant a ognidun di lôr un redit di dôs marchis di danârs.
1266
A Flambri al esisteve un ritrat di Federico Rodolfo II. Chest ritrat al esisteve inmò tal 1327 e tal 1385. Forsit si intint il cjistiel di Flambri inferiôr.
1275
Asquinio di Varmo e Porzitta d’Attems a verin in feut, de glesie aquileiese, un mans di Flambri.
14.6.1278
Di cheste date e je la prime notizie di un plevan di Flambri. Al è Martino da Crema, muini di Raimondo Della Torre, patriarcje di Aquilee.
20.3.1286
Alberto, cont di Gurize, al ordenà so gastalt a Flambri di no fâ nuie in merita e avocazie di Rivolt e Bicinins, dade di so pari al cjapitul di Cividât, cemût che al rivà a dimostrâ Bernardo, dean di chel cjapitul.
8.1296
Il patriarcje di Aquilee Raimondo Della Torre al de il canonicât di Trent al plevan di Flambri, Napoleon.
1296
Te valutazion des decimis plebanâls fate in chel an si decidè cheil plevan di Flambri al veve di paiâ 140 liris gruessis ad an, dividudis in dôs ratis.
6.4.1297
Il patriarcje Raimondo Della Torre al de la invistidure feudâl di cualchi ben, tra chei un mans di Flambruç a Ermanno qm. Comoretto di Arensperch.
21.3.1299
I nobii Folcherio di Walsperch e Pacio di Flambri a jerin gastalts a Flambri, par cont di Enrico, cont di Gurize.
1300
A Asquinio di Varmo al fo confermât il possès di un mans a Flambri, impen a Vecellio di Feagne a forin dâts trê mâs in feut ret e legâl de glesie aquileiese. Altris possès a Flambruç a forin confermâts a diviers siors.
19.4.1305
In chê dì al jere gastalt a Flambri Carismano di Gurize. APE Catapano. 19.4
1310
Il cont di Gurize, cjapitani gjenerâl dal Friûl, al potenzià lis difesis dal Castellutto fasint slargjâ i mûrs e i fossâi. Al donà duncje une abitance a Leonardo di Brazzà. Forsit al donà ancje altris abitancis simpri in funzion di un potenziament dal lûc. A Lazzarini, Flambri, art. cit. F. di Manzan, Anâi, cit., vol. 3, pagj. 416.
11.3.1313
Il cont di Gurize al concedè a Febo e a Raimondo Della Torre il cjistiel di Flambri inferiôr, obleantju a difindi, in timp di vuere, il lôr princip in dut il teritori comprendût tra il Tiliment e il Lusinç.
19.7.1316
I canonics dal cjapitul di Aquilee a faserin bon il rindicont des jentradis de plêf di Flambri, presentât dal tesorîr Rainaldo Della Torre e a fitarin par un an la metât de plêf stesse a Corrado, pal presit di 10 marchis.
17.1. 1319
Pagano Della Torre, Vescul di Padue e aministradôr dal Patriarcjât, dopo de muart dal patriarcje Gastone Della Torre, al ordenà che i vignìs presentade une copie dal Privileç (11 di Març dal 1313) che cun chel Enrico Cont di Gurize al veve dât in feut a Febo e Raimondo Della Torre il cjistiel di Flambri inferiôr e lis sôs competencis.
1320
Il cont Enrico di Gurize al concedè a Enrico di Prampero la avocazie di Listize e S. Vidot.
13.2.1330
Intune stime fate di Giovanni, abât di Rosacis, di Guidone, dean di Cividât, di Meglioranza, canonic di Udin e plevan di Varian e di Rainaldo Della Torre, tesorîr dal patriarcje e plevan di Flambri, si decidè che la tassazion de plêf e fos di 28 marchis.
31.3.1332
Rainaldo Della Torre, plevan di Flambri, al scrivè il so testament e cun chel al metè cualchi legât ae glesie di Flambri.
14.1.1340
Pe prime volte si à la notizie di un clericât a Flambri. In chê dì al fo metût tal possès di chel benefici tâl Francesco di Vicenza.
1343
Mainart VII, cont di Gurize, al rinovà la concession di Castellutto a Febo Della Torre. A chel a jerin metûts dongje i borcs di Rivarote, Talmassons, Gnespolêt, etc.
27.11.1344
Il cont di Gurize, Mainart VII, al vendè i cjistiei di Belgrât e Flambri inferiôr e lis gastaldiis di Flambri e Codroip a Valterpertoldo di Spilimberc, par 2500 ducâts.
5.12.1344
Valterpertoldo di Spilimberc al prometè di tornà i cjistiei di Flambri inferiôr e di Belgrât ai conts di Gurize cuant che i fossin stâts tornâts i bêçs che al veve spindût.
31.8.1346
Il Comun di Udin, cun a cjâf i Savorgnan, al metè i siei dirits sul Castellutto e su Ariis e al scrivè une letare a Ermacora Della Torre. Lis barufis, tacadis za cualchi an prime, a saressin finidis in maniere tragjiche. I Savorgnan, poiâts dal patriarcje Bertrant e a cjâf de fazion udinese, si cjatarin sot des muris dal Castellutto e a vincerin sui torians. Il cjistiel al fo sdrumât.
25.1.1384
Un taramot trement al sdrumà il medi Friûl e al ruvinà la grande part dai cjistiei. Cun di plui al finì par butâ jù dal dut i rescj dal Castellutto che doi agns prime al jere stât sdrumât dai udinês.
27.5.1350
Lis lotis tra la fazion udinese dai Savorgnan e chê dai conts di Gurize, che a chei si jerin unîts i Della Torre, a lavin indevant. Tal mês di Mai dal 1350 i udinês a rivarin a cjapâ la cortine di Flambri. Ai 25 di Mai Federico Savorgnan, gastalt di Udin, al ordenà a Ettore, cjapitani di Flambri, di sdrumâ la cortine. L’ordin al fo eseguît ai 27 dal stes mês.
2.6.1351
Ma Flambri al tornà a passâ subit tes mans dai gurizans, tant al è vêr che il cont Enrico al prometè di mantignî la ipoteche sul cjistiel di Belgrât e su la gastaldie di Flambri dade di so fradi Mainart a Castrone de’ Bardis, che la sô famee e jere dut câs in bogns rapuarts cui Savorgnan.
7.3.1354
I abitants di Castellutto a zurarin obedience e fedeltât ai Conts di Gurize. Cemût che si viôt ancje chest feut al jere tornât tes mans dai conts di Gurize.
1357
La decime, di paiâsi al patriarcje di bande dal plevan e dal cleric di Flambri, e vignè stimade in 17 marchis di denârs.
1363
Il cont Enrico di Gurize al confermà a Febo Della Torre la invistidure di Flambri Superiôr, impen il cont Mainart i confermà chê di Castellutto.
24.7.1365
Il nodâr Giovanni Guglielmo, fi dal nodâr Martino di Flambri, al lassà un mâs ae glesie di Flambri cul vincul di fâ celebrâ une messe ad an e di tignî impiât l’altâr di S. Jacum, che lui stes al veve fat fâ sù.
16.1.1392
Pietro Camillo Della Colonna, plevan di Flambri, al fità i vuadagns de plêf a un ciert Pietro Foraboto, par cuarante ducâts di aur ad an.
22.12.1400
Pape Bonifacio IX, al permet al plevan di Flambri, Giacomo Gervasio, di liberâ Tristano di Savorgnano par vê copât il patriarcje Giovanni di Moravia, imponintje però cualchi pinitince, come un pelegrinaç a Madone di Mont.
2.6.1415
Enrico IV, cont di Gurize, al cjapà a Costanza, dal imperadôr Sigismondo di Lussemburc, la invistidure de contee di Gurize, dal palatinât di Carinzie, de contee di Hemburg e de jurisdizion di Flambri.
1455
Il vicjari patriarcjâl al visità la glesie di S. Antoni a S. Vidot.
20.4.1466
Leonardo cont di Gurize al invistì di une part dal cjistiel di Castellutto, in feut ret e legâl, Giorgio di Codroipo, citadin udinês so fedêl, ordenantie l’oblic di prestâ il zurament di fedeltât tes sôs mans.
10.1477
La plane furlane e fo fiscade dai turcs. Tancj paîs a forin brusâts e sdrumâts. Tra chei S. Vidot, che di chel moment al scomparì, e Flambri dulà che a forin massacrâts tancj abitants, comprindût il vicjari pre Giuliano.
27.2.1497
E fo firmade une convenzion, che e durave 12 agns, tra l’imperadôr Massimiliano I e Leonardo, cont di Gurize, dulà che chest ultin al dave a Massimiliano I i cjistiei di Cormons, Belgrât, Codroip, Puart di Latisane e Flambri (Castelletto), cui lôr dirits e pertinencis. Par cuintri Massimiliano al dave al cont i cjistiei cun jurisdizion di Vipà, Traburg e Mosburg, cui lôr dirits e pertinencis.
1498
L’imperadôr Massimiliano, debitôr di cirche 68.000 fiorins tai confronts di Giovanni Federico, duche di Sassonie, i de in paiament parziâl di cheste sume, il domini des trê jurisdizions di Cormons, Belgrât e Cjistielgnûf, prometint di dâi ce che al restave dal teritori di Gurize dopo de muart dal cont Leonardo.
7.9.1508
Il senât venit, pai bogns servizis di Girolamo Savorgnan e par rifondilu des spesis pe vuere, i concedè par vot agns il cjistiel di Belgrât.
19.4.1515
La Republiche Venete, prime che e scjadès la concession di vot agns fate a Girolamo Savorgnan, i donà il cjistiel di Belgrât cun dute la sô jurisdizion. Cussì Flambri, dipendent di Belgrât, al passà sot di chê famee.
9.9.1515
Il cont Girolamo Savorgnan al ven metût dentri tal possès de contee di Belgrât.
13.8.1516
E je la date de firme dai pats di Noyon dulà che, par chel che al inten la contee di Belgrât, si stabilì che e restave sot dal domini venit. I pats a forin po confermâts te diete di Worms ai 3 di Mai dal 1521.
17.3.1520
Maestro Giuseppe Gaspare, pitôr venit che al viveve a Udin, al concordà di piturâ la capele de glesie di Flalmbri. Al veve di jessi forsit un altâr laterâl.
12.11.1533
Intun arbitrât fat a Trent al fo stabilît che la contee di Belgrât e la jurisdizion di Flambri inferiôr a restavin sot di Vignesie. Al è clâr che il possès de contee di Belgrât e restà simpri ai Savorgnan, impen il teritori di Flambruç al restà ai di Codroip, che lu vevin vût tal 1466.
27.6.1535
Al fo stabilît che la Republiche di Vignesie e tornàs al duche Federico di Sassonie Belgrât e Cjistielgnûf cu lis lôr conteis. Si riferissisi ae concession fate dal duche tal 1498 di bande di Massimiliano imperadôr, che Vignesie e veve i dirits in chestis tieris. Al è clâr che il possès al restà simpri ai Savorgnan. La dispute e restà e si cirì di comedâle tal 1563, ma cence nuie di fat.
30.3.1536
Pes disputis vignudis fûr pe nomine di Girolamo Savorgnan come plevan di Flambri, il vicjari gjenerâl dal patriarcje al impedì l’ûs dai sacraments te glesie plebanâl.
4.8.1536
Girolamo Savorgnan, po vescul di Sebenico, prin dai plevans di cjase Savorgnan a Flambri, al fo metût tal possès de plêf.
8.5.1591
Al murì a Rome il plevan Girolamo Savorgnan. Cun testament dai siet di Març dal 1590 al veve lassât un leât ae glesie di Flambri.
1593
Il pitôr Daniele Delfino al piturà cualchi afresc tal sofit de glesie di S.Marie.
15.10.1595
Il vicjari foranei Giuseppe della Forza al visità la glesie plebanâl di Flambri. Il dì dopo al le a Virc e tes glesiis di S. Zuan Batiste e S. Antoni abât.
18.12.1646
E murì Ottavia Pepoli, seconde femine, cumò vedue, dal marchês Mario Savorgnan. E veve lassât un leât di 6 messis, di paiâsi cu lis renditis di un cjamp a S.Vidot, come che al risulte di un at dal 1642.
15.3.1651
Al murì a Flambri il cont Giulio Savorgnan, za plevan dal 1619 al 1641. Al fo sepulît tal cimiteri e il cuarp, ai 7 di Novembar dal 1653, a forin puartadis te glesie di S.Stiefin a Udin, dulà che a son tancj famôs Savorgnan.
3.5.1717
Il cont Giovanni Savorgnan, podestà di Chioggia e fradi dal plevan, al donà lis relicuiis di S.Crôs.
15.9.1727
Al fo benedet il gnûf altâr maiôr che si viôt inmò vuê.
16.11.1727
A forin pe prime volte metudis fûr in glesie lis relicuiis dai Ss. Felice e Fortunato, donadis dal cont Giovanni Savorgnan.
23.2.1728
Al fo concedût un privileç ae confraternite dal Santissim Sacrament.
2.9.1729
Al fo demolît il vieli tor dongje de glesie e e fo restaurade e metudis gnovis cjampanis la tor de puarte de cortine.
21.8.1732
Si fasè une procession gjenerâl di dute la plêf ae Beade Vergjine des Graciis a Udin par domandâ la ploie. A parteciparin il vicjari di Flambri, i predis di Talmassons e di Bertiûl, vot capelans, dîs predis e cinc clerics che a compagnavin plui di doi mîl personis e cincuante crôs.
12.10.1735
E fo metude jù la prime piere de gleseute di palaç Savorgnan.
21.6.1736
La font dal batisim de glesie di S.Marie e fo spostade de bande setentrionâl a chê meridionâl de glesie.
12.8.1736
E fo benedide la gleseute di palaç Savorgnan.
12.5.1737
E fo celebrade la prime messe sul gnûf altâr di S. Josef e a chel al fo concedût un privileç, ai 6 di Setembar dal stes an.
31.5.1738
A misdì cirche la principesse Maria Amalia di Polonie e so fradi il princip Federico Cristiano a faserin la Stradalte par lâ bande Napoli.
25.3.1741
Sul tor al fo metût un orloi.
31.10.1753
Stant che a jerin simpri problemis di confins tra l’Imperi e la Serenissima, tal 1752 si tignì un congrès par cirî une soluzion. Il congrès al finì ai 16 di Setembar dal 1756 cuant che i doi guviers a ratificarin i tratâts firmâts dai doi rispetîfs comissaris plenipotenziaris. I cjapitui dal tratât a forin però sotscrits, ratificâts e metûts in vore. Il cjapitul che al rivuardave i confins tra Flambri e Virc al fo sotscrit ai 31 di Otubar dal 1753.
7-8.12.1785
A forin controlâts i confins tra Virc (austriac) e Flambri (venit) par sigurâsi che a corispuindessin a chei definîts cul tratât dal 1756. La comission verificadore e ordenà che a fossin tornâts a fâ i doi capitei di confin, metûts su la Stradalte, che a jerin stâts disfats.
1796
Al comun di Flambri al fo comandât di inviâ vot soldâts des cernidis al Servizi Public. Lis spesis di mantigniment a jerin a caric dal comun stes che, par soperî, al decidè di tassâ lis tieris, lis personis e i animâi. Al jere un dai segnâi, che il paîs al sintì, dai prossims aveniments che a varessin puartât ae colade de Republiche di Vignesie.
19.2.1797
Giovanni Biasioni, agjent dai Savorgnan di Flambri, al scrivè a Vignesie disint di vê savût che dîs mîl soldâts ongjarês a saressin vignûts in Friûl la setemane dopo e che 1200 di lôr si saressin fermâts a Flambri.
4.10.1797
A passarin pe Stradalte, lant bande Palme, doi mîl soldâts francês.
11.1.1798
Sietcent fants todescs si fermarin te vile Savorgnan e a restarin fint a misdì di doi dîs dopo. La sere dai 14 la operazion si ripetè cun 500 soldâts di cavalarie, simpri todescs.
19.10.1805
Une bande di soldâts francês, che a passavin par Flambri, a robarin tal archivi plebanâl, puartant vie tancj documents e fasint altris violencis. La gleseute di S.Zuan Batiste, za metude mâl, doprade par da ricovar ai soldâts, e fo bandonade e in chê dì si fasè la ultime messe.
20.7.1809
Il cont Antonio Savorgnan, dal ram Del Torre, al de i siei bens al oresin venezian Antonio Moro, par paiâ une part dai siei debits.
20.5.1827
Il popul al le in procession te glesie S.Zuan Batiste e li pre Antonio Gressani al poià la prime piere dal gnûf edifici. La piere e fo metude come fonde a metât dal mûr orientâl, daûr dal altâr.
22.6.1828
E fo benedide di pre Antonio Gressani la gnove glesie di S. Zuan Batiste. Pre Giacomo Toneatto, di Flambri, al celebrà la messe. Doi dîs dopo si celebrà pe prime volte, dopo 23 agns, la solenitât dal sant.
25.12.1829
E fo metude la epigrafe parsore de puarte de glesie di S.Zuan. E fo scrite di pre Pietro Braida, canonic di Udin, che e jere di chê famee Braida che e veve tancj interès economics a Flambri.
13.3.1834
Francesco Girelli Savorgnan, ultin plevan de famee, al murì in cjase Moro a Çuian e al fo sepulît doi dîs dopo in chel cimiteri.
1834 – 1835
Un sut distrutîf al cjapà la zone: si suiarin lis roiis, i mulins si fermarin par nûf mês, si suiarin parfin i poçs. Dome chel de place al restà in funzion. Al colà però ai 19 di Novembar dal 1834 e al fo tornât a vierzi ai 28 dal stes mês, in forme provisorie. Si jentrave dal font, par cjapâ aghe, midiant scjalis. Tal mês di Mai dal 1835 al fo sistemât in muradure e dome tal Dicembar dal stes an a forin metudis lis bintis.
25.5.1835
La prime rogazion e fo fate in puescj dulà che no si jere mai fate, par preâ pe ploie. Si scomençà pe strade Gran Levade fin oltri la campagne clamade Maschis e po si le daûr de roie bande ocident fin al palût de Brusade. Si cjapà la strade omonime tornant tal paîs.
15.8.1835
Si tornà a celebrâ te glesie plebanâl dopo che par un mês si jerin fermadis lis funzions par podê cambiâ il paviment. Intant si jere celebrât tal oratori Savorgnan.
31.5.1837
Viers sere al fo un grant temporâl che al sdrumà la racuelte di dut il teritori.
9.11.1862
Il protonodâr apostolic pre Carlo Filipponi, predi di S.Ulderì a Udin, al benedì il gnûf cimiteri di Flambri che, daûr lis disposizions che ajerin inmò chês napoleonichis, al fo fat sù lontan dal abitât.
27.7.1866
Dilunc dai aveniments de tierce vuere di indipendence ancje il nestri paîs al fo interessât di moviments militârs. In chê dì su la Stradalte si fermà il cuartîr gjenerâl dal prin cuarp de armade, impen dongje dal paîs si fermà la cuinte division.
28-29.7.1866
Intant che il prin cuarp de armade si jere spostât te seconde linie, a nord-ovest di Palme, chi si jere disponût il cuarp di risierve, cul cuartîr gjenerâl a Flumignan e lis brigadis a Flambri, Lumignà e Cjampfuarmit.