Cjarte di identitât eletroniche – C.I.E.
Dai 18 di Mai dal 2018 il Comun di Talmassons al dâ fûr la Cjarte di identitât eletroniche.
La cjarte di identitât e je il document che al ateste la identitât di une persone.
Se nol è specificât in maniere diferente, la cjarte di identitât dade fûr ai citadins talians e je valide ancje pal espatri tai Paîs de aree Schengen.
De date di emission de C.I.E. il Comun di Talmassons NOL darà plui fûr cjartis di identitât di cjarte, a part i câs di reâl e documentade urgjence segnalade di chei che le domandin par motîfs di salût,
viaç, consultazion eletorâl e partecipazion a concors o garis publichis, come previodût de circolâr n. 8/2017 dal Ministeri dal Interni.
NO si pues sostituî il document di identitât di cjarte inmò valide cu la C.I.E.
Lis cjartis di identitât dadis fûr in cjarte a restin validis fin ae scjadince.
Document di identitât di cjarte
Normativis principâls di riferiment: test unic des leçs di Sigurece publiche (R.D. 18.06.1931, n. 773 e modifichis sucessivis e zontadis). Leç dai 21.11.1967 n. 1185 "Normis sui passepuarts".
Descrizion dal servizi: e ven dade fûr a ducj i citadins talians e forescj e e à validitât par dîs agns pai maiôrs di etât. Pai minôrs di 3 agns la validitât e je di 3 agns.
Pai minôrs dai 3 ai 18 agns la validitât e je di 5 agns.
A partî dai 26 di Jugn dal 2012 i minôrs che a viazin a àn di vê ognidun il propri document di viaç individuâl e no puedin duncje jessi scrits sul passepuart dai gjenitôrs.
La cjarte di identitât e je valide pal espatri tai paîs de U.E. e in chei dulà che a son acuardis internazionâi.
Ai citadins forescj che a àn un permès di permanence regolâr e ven dade fûr cence validitât pal espatri.
Si domande diretementri al Sportel dal Ufici anagrafe mostrant la cjarte di identitât scjadude o altri document di ricognossiment valit.
Se nol è chest, la identitât di chel che lu domande e à di jessi certificade di doi testemonis di maiôr etât che a vedin i documents valits.
La sprolungje si pues fâle 180 dîs prime de scjadince.
Il stât civîl nol ven plui indicât se no su richieste specifiche dal interessât.
Recuisîts eventuâi domandâts:
- vê la residence (o il domicili tal comun, vint vude la conferme dal Comun di residence)
- jessi iscrits A.I.R.E.
Documents di presentâ: pe emission o rinovazion
1. par citadin talian e comunitari di maiôr etât:
3 fototessaris compagnis e resintis
Document di ricognossiment valit, o cjarte di identitât scjadude, o doi testemonis di maiôr etât cun document di ricognossiment valit.
2. Par citadin talian cun fîs minôrs:
3 fototessaris compagnis e resintis
Declarazion di vê l’assens dal om/femine o dal convivent su model prestampât, o mostrâ il permès dal Judiç tutelâr.
Tal câs di doi gjenitôrs separâts o divorziâts al covente l’assens di chel altri gjenitôr o copie de sentence di divorzi o separazion di dulà che al risultedi l’assens pal espatri. Se no si à chel scrit chi parsore si à di mostrâ il permès dal Judiç tutelâr.
3. Par citadin talian interdet o inabilitât:
3 fototessaris compagnis e resintis
Richieste e declarazion fate dal tutôr o curadôr.
4. Par citadin forest:
3 fototessaris compagnis e resintis
Permès di permanence o cjarte di permanence in cors di validitât.
Tal câs che e vignedi pierdude o robade par vê il duplicât si à di presentâ denunzie fate ai Carabinîrs o ae Autoritât di Publiche sigurece.
Servizi a domicili
Pes personis che par motîfs fisics no puedin presentâsi tal Ufici Anagrafe al è pussibil domandâ l’emission o la rinovazion de cjarte di identitât presentant la documentazion domandade midiant tierçs.
Cost dal servizi: 5,42 euro
Cu la jentrade in vore dal D.L. 112 dai 18 di Jugn dal 2008 relatîf aes “Disposizions urgjentis pal disvilup economic, la semplificazion, la competitivitât, la stabilizazion de finance publiche e la perecuazion tributarie”,
a partî dai 26 di Jugn dal 2008 e je stade sprolungjade la validitât de cjarte di identitât di cinc a dîs agns.
Cu la jentrade in vore dal D.L. n. 5 dai 09/02/2012, art. 7, i documents di identitât burîts fûr a partî dai 10/02/2012 a varan scjadince tal dì e tal mês di nassite dal titolâr, subit dopo de scjadince che e sarès previodude pal document stes.