Sport

Sport

“Vivi al è svolâ, sport al è vite”

Al è aromai dimostrât che la ativitât sportive e puarte beneficis pal individui sot tancj ponts di viste: dal miorament des sôs condizions fisichis e psichichis, al disvilup des relazions sociâls, de integrazion sociâl e solidâl al rispiet des regulis, de capacitât di gjestion dal timp libar al rispiet pal ambient. In tiermins plui specifics il sport al à diviersis funzions:

funzion educative, stant che la libare ativitât sportive e je un bon strument par ecuilibrâ la formazion individuâl e il disvilup uman a cualsisedi etât;
funzion sanitarie, stant che la ativitât fisiche e rapresente une ocasion di miorament dai stîi di vite dai citadins e e pues contribuî a preservâ la salût e la cualitât de vite fint a une etât avanzade;
funzion sociâl, stant che il sport al è un strument bon par promovi une societât plui solidâl, par lotâ cuintri de intolerance e il razisim, la violence e l’abûs di alcol e l’ûs di sostancis tossichis;
funzion moralizadore par vie che al puarte valôrs di solidarietât, di leâl concorince, di spirit di scuadre, di fair play.

Tal ambit dal progjet “Vivere è volare, Sport è vita”, par valorizâ la ativitât sportive in dutis lis sôs formis, la Aministrazion comunâl di Talmassons e à istituît tal 2004, cul contribût di dutis lis associazions sportivis dal teritori, un elenc di aur dal sport comunâl par valorizâ chei che a àn operât in maniere significative tal ambit dal sport pe comunitât. Ogni an chel elenc si insiorarà cun trê gnovis personalitâts: un atlete, un dirigjent, un tifôs, che cu la lôr ativitât a àn rapresentât une vore ben i valôrs de “vite sportive”.

Tal 2004 a son stâts inserîts tal elenc i doi atletis olimpionics Annibale Frossi e Fabio Mangilli.

Tal 2005 si son zontâts Ido Sgrazzutti, sielt pe sô abilitât di atlete professionâl e pe passion dedicade ae formazion sportive dai zovins, Edo Vissa, che come president pai 30 agns de Polisportive Flambri al à savût a fâ cressi la societât cu la sô semplicitât e bonarietât, e ae fin Debora Fabbro che, ancje se disabile, apassionade di balon, e partecipe a ducj i apontaments dal Flumignan.

L’elenc di aur al è cussì componût:

An 2004

Atlete ANNIBALE FROSSI (olimpionic)

FABIO MANGILLI (olimpionic)

An 2005

Atlete IDO SGRAZZUTTI

Dirigjent EDO VISSA

Tifôs DEBORA FABBRO

“Lis memoriis di Ido Sgrazzutti”

O ai scomençât a zuiâ tal campionât juniores 1961/62 cu la Rinascente Flambro di Bepo Toneatto. Tal 1962/63 o soi passât tal Rivignan dulà che, a 16 agns, o ai tacât a zuiâ in prime scuadre. Tal 1963/64 o soi passât cul Latisane, dulà che o ai zuiât par un campionât. In chel dopo o soi stât cedût ae Sangiorgina di S. Zorç. Al è stât l’inizi de mê cariere, in gracie dal alenadôr Silvano Moro, che in doi mês al à trasformât la mê volontât e il gno cori a vueit di centrocampist intun tercin di marcament. O soi passât in pôc timp te prime scuadre e po dopo te rapresentative zovanîl dal Friûl – Vignesie Julie. Tal 1965/66 o jeri inmò te Sangiorgina ma lis mês cuotazion a lavin sù, o zuiavi cu la rapresentative dal Friûl – Vignesie Julie. Ae fin o soi stât convocât te nazionâl diletants, dulà che o ai zuiât par cuatri partidis: a Gurize, Ancona, Lecce e Brest.

Te stagjon 1966/67 o soi passât tal Udinês in serie C, dulà che o ai zuiât 30 partidis. Te stagjon 1967/68 o jeri inmò a Udin e no cate il servizi militâr te Compagnia Atleti di Bologne o ai zuiât dutis lis 38 partidis dal campionât. Vie pal servizi militâr o ai zuiât ancje cu la nazionâl militâr.

Te stagjon 1968/69 o soi passât tal Palermo, che al jere stât promovût in serie A, e il gno esordi in serie A al fo ai 2 di Fevrâr dal 1969 cuintri Rombo di Tuono Gigi Riva. Dilunc de stagjon 1969/70 inmò in serie A o ai zuiât 20 partidis, ma ae fin o sin lâts in serie B.

Tal Tal 1970/71 o ai zuiât 19 partidis in serie B e o rivarin sedicesims. Tal 71/72 inmò in B o ai zuiât dutis lis 38 partidis, o rivarin tierçs e a forin promovûts in serie A. Tal 1973/74 o soi tornât cul Udinês dulà che o ai zuiât par trê stagjons fint al 1976.

In dut cu la maie blancje e nere o ai zuiât 173 partidis.

Cuant che al è rivât Sanson il diretôr Dal Cin mi disè cussì: “Lui nol rientre tai plans de societât”. O soi restât fer doi mês, po Dal Cin mi à mandât a Potenza in serie D dulà che, par atacs continuis di tachicardie, mi diserin di sospendi la ativitât.

Cussì tal 1977/78 mi soi tornât a cualificâ come diletant e o ai zuiât cul Flumignan in prime categorie, cun di plui o alenavi la prime scuadre e il setôr dai zovins, po o soi passât tal Puçui, dulà che o zuaivi e o alenavi, e dulà che o ai sierade la mê ativitât di zuiadôr a 38 agns. O soi lât indevant po cu la ativitât di alenadôr tai setôrs dai zovins di Torse, Puçui, Mortean, Lavarian. Dal 1997 o soi restât cence fâ nuie finta e clamade dal Flambri, dulà che tal finâl di campionât di chest an o vin otignût la promozion ai play-off.

Cumò o soi te Comunâl Listize.

Edo Vissa

Tal an 1968 si costituìs la Societât Polisportive Flambri, polisportive parcè che oltri al balon i sports a son ancje il zûc des balis, la cjace e la pescje. Subit dopo e scomence la aventure de scuadre di balon dal Flambri che “e va sui cjamps a zuiâ”.

Al è il 1969 cuant che al ven nomenât vice president Edo Vissa. Tal 1972 lis cjariis a son rinovadis e al ven elet president.

Al scomence il prin dai trente agns che lu àn viodût president. O vin podût preseâ lis sôs dotis umanis e sportivis par un progjet ben clâr tal so cjâf: fâ cressi e svilupâ la polisportive, coinvolzint di volte in volte dutis lis fuarcis vivis e ativis dal paîs cul fin di puartâ in alt, come che al dîs dispès, il bon non di Flambri. Al è rivât a fâlu. Al è passât parsore dai particolarisims, lis diviersis visions, che pal solit intune comunitât ative come la nestre dispès si incuintrin. I siei mûts di fâ, la semplicitât, la bonarietât, no i àn impedît di rivâ a fâ ce che al ritigneve impuartant. Parfin par autofinanziâsi, cul coinvolziment di dute la comunitât, al creà l’alevament di cavalîrs, une letare di mandâ a dutis lis fameis par relazionâ su la ativitât fate e insiemi une buste cu lis ufiertis. Ducj a jerin gjenerôs e chest al permeteve di frontâ lis dificoltâts cun plui entusiasim e mancul rassegnazion. Po si tacà a organizâ il torneu intercomunâl dai bar a nivel amatoriâl, che inmò vuê si fâs ogni an. Cualchi an fa al decidè di colaborâ cun chês altris societâts dal Comun te gjestion di setôrs dai zovins otimizant capacitâts, risorsis e struturis. Al veve capît che il paisut, ancje se al restave chel, al podeve vierzisi a gnûfs orizonts di oportunitât. O sin duncje rivâts al dì di vuê: al è il 2002 cuant che Edo Vissa al lasse il testemoni a un gnûf president, Luigi Sioni, persone che e à fat un pat di sanc par che i valôrs, la morâl che al veve semenât tal teren fertil de condivision, a podedin durâ a lunc e puartâ i beneficis che Edo Vissa al à simpri sperât e crodût.

Debora Fabbro

E je une grande apassionade di balon, tifose dal Milan, ma la sô prime scuadre e je il Flumignan. E compagne di simpri la formazion di cjase e e va sui cjamps di balon insiemi ai zuiadôrs tra vitoriis e concuistis. Nus à parût impuartant e significatîf sotliniâ un esempli di passion sportive cussì san e incondizionât. Grazie Debora, pal entusiasim che tu trasmetis e tu regalis al mont dal sport!