La rêt stradâl antighe

Fin a pôcs agns indaûr si pensave che la basse plane no fos stade tocjade dai colons e dai gromatics romans, par vie dal teren dificil e paludin. Studis resints a àn metût in lûs olmis di centuriazion ancje in chest teritori; al è clâr che la sistemazion agrarie romane e je stade scancelade in chestis zonis dai mudaments de nature e des oparis di bonifiche, forsit soredut de presince de aghe in ete medievâl.

L’orientament des stradis al è restât cuasi compagn te part setentrionâl dal teritori, che al mostre inmò lis olmis de centuriazion romane. Nol è cussì a sud dulà che, se al esisteve un percors paralêl a chest, o ben a cardins e decumans, al è cuasi dal dut sparît. Si viôt invezit une serie di stradis paralelis che a vegnin sù di sud a colegâ chês areis cul nord; a son percors documentâts fin de ete medievâl, cuant che a supuartavin il trafic comerciâl tra lis dôs areis.

Il fat, dut câs, che la plui part di chês si clamin “levade”, al fâs pensâ che a sedin stradis fatis sù in epoche romane, magari tarde o pal plui in ete alte medievâl, stant che chel non daspò nol à plui coventât. O podìn duncje nomenâ la Strade comunâl Levade che di Torse e mene a Talmassons e lis dôs “levadis” di Flambri: la Grande Levade o La Grande, une volte plui impuartante, e la Piçule Levade o La Piçule. Dutis dôs a colegavin Flambruç cun Flambri e di chês a àn cjapât il non cetantis rois e terens; o pensi duncje che chês, par motîfs che culì no si puedin spiegâ, a vebin vude une funzion fondamentâl tal disvilup de vile di Flambri e di dut chel lûc, tant di fâlu deventâ sede di une plêf za cul secul X cirche.

Cetantis altris “levadis” a corevin te plane basse cul stes orientament; o podìn ricuardâ chê che e menave di Cjasteons di Strade fin a Maran, subit a est dal teritori che nus interesse; une altre e je la “Levatta”, a pene fûr de bande ovest dal teritori indagât e che di Vuirc e mene a Flambruç.

Un puest particolâr, in chest discors, a cjapin la Stradalte, za Postumie, e la strade, paralele a cheste ma un chilometri plui a sud, dulà che a son i paîs; cumò si le cognòs come Strade provinciâl Ungariche, ma no je di confondi cu la Ungaresca, che e e coincît cu la Stradalte e e fo clamade cussì daspò des sdrumariis dai Ongjars tal IX secul. E cjapà il non di Stradalte propit par diferenziâsi di chê paralele plui a val, che e passe pai paîs e si pense che e sedi pôc plui antighe. La storie de Stradalte e je dal prin periodi roman e e je peade a lis vicendis plui impuartantis de medie plane furlane.