Autocertificazion

Utents principâi: citadins.

Normativis di riferiment principâls: D.P.R. 28.12.2000, n.445 - art. 46

Descrizion dal servizi: tai rapuarts cu la Publiche Aministrazion e cui gjestôrs o esercents di servizis publics (E.N.E.L., Telecom, etc.), e i privâts che lu permetin, il D.P.R. n. 445/2000 al previôt di sostituî i certificâts domandâts cu la declarazion sostitutive di certificazion. La stesse e pues jessi doprade par comprovâ chescj fats, stâts o cualitâts personâls:

  • date e puest di nassite,
  • residence,
  • citadinance,
  • gjoldiment dai dirits civîi e politics,
  • stât di no maridât, maridât, vedul o stât libar,
  • stât di famee,
  • esistence in vite,
  • nassite dal fi, muart dal om/femine, dal assendent o dissendent,
  • iscrizion in listis o elencs tignûts di Aministrazions Publichis,
  • apartignince a ordins professionâi,
  • titul di studi, esams sostignûts,
  • cualifiche professionâl, titul di specializazion, di abilitazion, di formazion, di inzornament e di cualificazion tecniche,
  • situazion dal redit o economiche, ancje pe concession di beneficis di cualsisedi gjenar previodûts di leçs speciâls,
  • compiment di oblics contributîfs specifics cu la indicazion de cifre corispondente,
  • possès e numar dal codiç fiscâl, de partide IVA e di cualsisedi dât presint tal archivi de anagrafe tributarie,
  • stât di disocupazion,
  • cualitât di pensionât e categorie di pension,
  • cualitât di student,
  • cualitât di legâl rapresentant di personis fisichis o juridichis, di tutôr, di curadôr e simii,
  • iscrizion a associazions o formazions sociâls di cualsisedi gjenar,
  • dutis lis situazions relativis al adempiment dai oblics militârs, comprendudis chês atestadis tal sfuei matricolâr dal stât di servizi,
  • di no vê vût condanis penâls e di no jessi destinataris di proviodiments che a integnin la aplicazion di misuris di prevenzion, di decisions civîls e di proviodiments aministratîfs iscrits tal caselari judiziâl, daûr de normative in at,
  • di no savê di jessi sot procediments penâi,
  • cualitât di vivi a caric,
  • ducj i dâts in cognossince direte dal interessât contignûts tai regjistris dal stât civîl,
  • di no cjatâsi in stât di licuidazion o di faliment e di no vê presentade domande di concuardât.

 

La autocertificazion no je ametude par certificâts medics, sanitaris, veterinaris, di origjin, di conformitât C.E.E., di marcs e brevets e pe documentazion su la ativitât judiziarie. In chescj câs e varà di jessi presentade la documentazion previodude des normis di pueste.

Lis declarazions falsis, la falsetât tai ats e l’ûs di ats fals a son punîts, daûr dal Codiç penâl e des leç speciâls in materie. Chel che al declare, cun di plui, al piert i beneficis eventualmentri vûts cun proviodiments adotâts su la fonde di declarazions no veris. La declarazion tal interès di cui che al è in situazion di impediment momentani, par motîfs di salût, e je sostituide de declarazion che e indiche la esistence di un impediment, scrite dal coniugât o, se nol è, dai fîs o, se no son, di altri parint in linie rete o colaterâl fint al tierç grât, al public uficiâl, vint aciertade prime la identitât dal declarant.

Documents di presentâ: il modul di autocertificazion al va dome sotscrit, nol à di jessi autenticât e nol covente alegâ nissun document di ricognossiment.

Modulistiche eventuâl di doprâ: il modul al pues jessi domandât al Ufici anagrafe, ancje vie fax.