Comune di Talmassons

Gjavât fûr di: "Presenze Romane nel territorio del medio Friuli, par cure di T. Cividini e P. Maggi".

SÎT N. 2 FLAMBRI – Glesie di S. Zuan

Inte aree juste daûr dal edifici cultuâl, che lis sôs origjins a somein jessi une vore antighis, si viodin tocs di modon puartâts in lûs cu la aradure.

La emersion di materiâl di ete romane e jere za stade notade tal 1984 di A. Tagliaferri, che al veve pensât che a fossin i rescj di une cjase. In realtât, daûr di ce che a disin fonts orâls, lis testemoneancis a van leadis a une aree funerarie, dal moment che tal imprin dai agns ’60 te zone a ovest de gleseute a vignerin fûr  trê tombis a la capucine cun cuviert di cops. In chê ocasion si vioderin ancje des olmis riferidis a altris sepolturis su la fonde de osservazion che, tai periodis di sut, in cualchi zone a profîl regolâr la jerbe e restave verde, par vie de umiditât plui alte dal teren determinade des presincis archeologjichis.

L’unic repert impuartant documentât al è un puntâl di anfore di produzion africane, che si pues meti dongje, par dimensions e caratars morfologjics, al cussì clamât “contignidôr a cilindri di grandis dimensions di ete imperiâl”, che al fo doprât pal traspuart di mercanzie tunisine (vueli e salsis di pes) dal V ai prins dal VII secul d.C. La sô presince tal contest in esam e pues jessi viodude come un indizi de esistence te necropoli, di là di tombis a la capucine, ancje di deposizions dentri di anfore, daûr di une usance des necropolis romanis, soredut tal periodi tart-antîc.

SÎT n. 4 TALMASSONS – Localitât Guarç

La rilevazion archeologjiche de zone e je dai agns ’80, cuant che dilunc dai lavôrs di riordin fondiari a son vignûts fûr i rescj di une piçule necropoli a incinerazion cun cuindis tombis; chestis a forin viodudis sul teren, suntune superficie totâl di cirche 120 mc, sot forme di maglis di cjarbon, dulà che si viodevin tocuts di vues brusâts. In chê ocasion al fo pussibil recuperâ une part dai ogjets fats a man dal furniment in bronç, che a jerin sedi armis sedi elements di ornament e imprescj, insiemi a uns vincj tocs di ceramiche di paste rosse, forsit di une ole par contignî lis cinisis dal muart.

La descrizion dai reperts cjatâts e je di A. Tagliaferri, che al à proponût une datazion dal contest sepulcrâl a une ete republicane tarde, ancje se i tocs a vevin elements preromans. Un studi sui materiâi fat plui indevant al à dut câs puartât a revisionâ cheste ipotesi cronologjiche, stant che al à classificade la ceramiche e i bronçs a categoriis di reperts che pal solit si cjatin in sepulturis di un periodi tra la ultime fase dal Bronç finâl (X sec p.d.C.) e lis primis fasis dal Fier (VIII-VII sec. p.d.C.).

La impuartance dal sît e je duncje cressude, sedi pe antichitât che pe varietât tipologjiche dai ogjets; a mertin une segnalazion cualchi esemplâr di ponte di lance, stant che a son atestazions plui antighis de usance di meti lis armis tes tombis, une vore documentade tes necropolis furlanis dome dopo, a partî dal VIII sec. p.d.C. Daûr de analisi fate, al reste fûr dal complès dai materiâi protostorics dome un ogjet, o ben un piçul claut di fier cul cjâf taront, che al somee pal plui di ete romane.

SÎT n. 5 – TALMASSONS - Cimitieri

Dilunc di ricercjis fatis tal 1984 al vignè in lûs materiâl fat di modons di ete romane vie pal teren a nord dal cimitieri, li de gleseute di S. Silvestri. La uniche robe di valôr cjatade e fo un pês di telâr di arzile, conservât tal Museu Archeologjic nazionâl di Cividât.

I dâts cjapâts sù in chê volte a son stâts tornâts a confermâ cu lis ultimis ricognizions in superficie, che a àn permetût ancje di verificâ la estension des evidencis archeologjichis – soredut tocs di cops – ancje inte aree subit a est dal mûr dal cimitieri. L’indicadôr pal incuadrament cronologjic dal sît al è un asse batût daspò de muart di Faustina I, femine di Antonino Pio (141 d.C.), insiemi a une altre monede di ete alto-imperiâl, che dut câs no si rive a lei; i materiâi documentâts no permetin di dâ altris interpretazions su lis carateristichis tipologjichis des struturis sepulidis.

SÎT n. 7 – FLAMBRI – Vie Spinucci

A Flambri a son cetantis testemoneancis che a permetin di localizâ une necropoli, cun tombis logadis di dutis dôs lis bandis di vie Spinucci. A nord-ovest lis primis scuviertis di sepulturis a la capucine a son dai agns ’30, cuant che a tacarin i lavôrs par fâ sù la scuele elementâr; po dopo, a forin altris scuviertis compagnis te seconde metât dai agns ’70, dilunc dai sgjâfs pes fondis di cjasis. Cualchi font orâl e dîs che a jerin cetantis tombis, metudis in rie in maniere perpendicolâr al as stradâl di vuê a cirche 3 metris une di chê altre.

Si à recuperât ancje ogjets di furniment – tra chei une monede di Tiberio (14-27 d.C), un vâs di arzile e une altre monede forsit di ete alto-imperiâl, ma chest materiâl no si rive plui a cjatâlu; a son impen documentâts doi tocs di anforis, cun impast che al somee di origjin italiche, forsit un esemplâr Dressel.

Daûr dai dâts cjapâts sù, cun di plui, cetancj cops doprâts pe cuvierture des tombis a vevin la marche di fabriche.

Vie pal limit a sud-est de strade atuâl al è stât cjatât – simpri dilunc di lavôrs – ancje siet deposizions, metudis in paralêl ae vie e cence rivestiments ni furniments. Lis diferencis dal orientament des sepolturis e de lôr tipologjie, forsit culì metudis dome intune buse di tiere, a fasin pensâ a un contest di un periodi diferent di chel di chê altre bande de strade; chest ancje par vie de mancjance di furniments, usance che si disvilupe a partî de metât dal V secul d.C., intune ete aromai post-romane.

I dâts des scuviertis, e soredut une valutazion gjenerâl de disposizion topografiche des tombis, a dimostrin che e jere une corispondence tra la vie Spinucci atuâl e une viele strade romane: o ben un toc di strade che, partint de vie Postumie, e lave bande sud ovest par Rivignan, colegant i teritoris de alte e medie plane cun chei de basse plane furlane. Al è di notâ ancje che il sît al è dongje di un limes de centuriazion, che vuê al corispuint a vie Vittoria e di un toc di strade che di Flambri e puarte li de gleseute di S.Antoni.

SÎT n. 8 FLAMBRI – Localitât Cortine

Il sît al è cetant impuartant, stant che al è stât sede dal cjistiel e dai mûrs medievâi, testemonis di events rilevants de storie locâl: tal 1346 e tal 1350 vie pes bataiis tra la fazion udinese cun a cjâf i Savorgnan e chê dai conts di Gurize cui Della Torre, che a puartarin ae distruzion dal cjistiel e de cortine, e po dopo tal 1477 te difese cuintri dai Turcs, a forin i ultins bastions.

Vuê si viodin ben i rescj de cortine soredut te part nord ocidentâl e a permetin di ricostruî – daûr di ce che al à dit T. Miotti cul jutori de documentazion grafiche di archivi – une “forme esagonâl iregolâr” e un perimetri complessîf di cirche 300 m, che al cjapave dentri ancje la glesie e cualchi cjase. Ancje il tor de glesie di S. Marie Anunziade al fâs part de cente, gjavât fûr cun intervents di incjamesadure e di rialçadure par meti dentri la cele de cjampane. Une testemoneance impuartante che e conferme lis origjins vielis e je vignude fûr dilunc dai lavôrs di consolidament des fondis de struture fats tal 1935, cuant che si cjatarin ogjets in bronç di ete alto medievâl, o ben un anel par dêt, uns doi cercluts e une fibule a disc forsit decorade cun smalt. Cescj manufats, magari cussì no, no si cjatin plui, ma o vin une fotografie tal archivi plebanâl che nus permet di inserîju tal contest culturâl paleosclâf di Köttlach tra il IX e i prins dal XI secul.

L’insediament te aree interne dal perimetri de antighe cente di mûr e je inmò plui viere, stant che lis ricercjis di superficie a àn mostrât, te zone a sud dal cimitieri, cetant materiâl archeologjic di ete romane, soredut cops e modons, e tocs di anforis e di ceramichis. Tra dut chest a son ancje vâs di mense (tiere sigjilade), che a puedin riferîsi a un edifici rustic cuntun setôr residenziâl, in acuardi cui rescj di tessaris di mosaic, di stabilidure piturade (Dpl), di tubui par implants di riscjaldament (Mcl)e di tocs di piere slissade. Cheste ceramiche e je un riferiment cronologjic de fase plui frecuentade dal sît che, ancje ae lûs de analisi dai tocs di anforis, al somearès jessi tal periodi tra la seconde metât dal I secul p.d.C. e la ete alte imperiâl. A chestis struturis si puedin riferî altris olmis impuartantis, cjatadis un cuindis agns indaûr te vigne che e passe te part setentrionâl de cortine, subit a est dal cimitieri. Il sît duncje al è une des areis archeologjichis plui amplis di dut il teritori comunâl, cuntune superficie di 5.000 mq.

SÎT N. 14 TALMASSONS – Localitât Lamanix

Une note publicade tal 1934 e dîs che a son vignûts in lûs “cualchi copesse, anforis e manufats in bronç fats une vore ben”, tal teren di Lino Turello dilunc de bonifiche. Il sît al è stât cjatât cuntune ricercje catastâl tai regjistris vieris dal Comun di Talmassons e su la cartografie de epoche, disponibile tal Archivi di Stât di Udin. In graciis dal numar limitât di fonts regjistrâts a non de persone nomenade al è stât pussibil individuâ une zone limitade a sud dal paîs, tra la strade par Torse e la Roie Macila.

La posizion cartografiche e je une vore impuartante se si pense che e je, insiemi cul sît schedât dopo, la uniche evidence archeologjiche cognossude te aree meridionâl dal comun, che e jere zone paludane, e la sô presince e je leade ae relazion cu la vie che di Flambruç e jentrave te vie Postumie passant par Flumignan.

SÎT N. 14 TALMASSONS – Canâl Miliane