Acuist de citadinance taliane
La domande di acuist de citadinance taliane e va presentade ae Prefeture competente dal teritori.
Il decret, di ritirâ li de Prefeture, al varà di jessi consegnât dal interessât al Ufici citadinance dal Comun che al metarà un apontament pe prestazion dal zurament di fedeltât ae Republiche.
L’acuist de citadinance al partìs de dì dopo vê prestât il zurament. L’ufici al previôt ae formazion dal at e ae comunicazion che e covente pal inzornament dal archivi anagrafic.
Normative di riferiment: L. n. 92/1991, modificade de Leç n. 92/2009; D.P.R. n. 572/1993 e D.P.R. 396/2000.
Ricognossiment de citadinance taliane a forescj di origjin taliane
I citadins forescj, di antighe origjin taliane, iscrits ae anagrafe dal Comun di Talmassons a puedin domandâ il ricognossiment de citadinance taliane presentant une domande di pueste in cjarte di bol al Ufici di Stât civîl.
Recuisîts par jessi ametûts al ricognossiment:
- Jessi residents tal comun
- Vê une citadinance dade su la fonde dal principi dal “jure soli” (par esempli Argjentine, Brasîl, Uruguay, Stâts Unîts, Canadà, Australie, Venezuela, etc.)
Ae domande a àn di jessi alegâts chescj documents, legalizâts e voltâts par talian se burîts fûr di autoritâts forestis:
- Estrat dal at di nassite dal von talian emigrât tal forest dât fûr dal Comun talian dulà che al è nassût;
- Ats di nassite di ducj i dissendents in linie direte, comprendût chel che lu domande;
- Ats di matrimoni dal von e dai dissendents in linie direte;
- Certificât dât fûr de Autoritât competente dal stât forest di emigrazion, che al ateste che il von talian nol à mai cjapade la citadinance dal stât forest di emigrazion/misure foreste di naturalizazion;
- Certificât dât fûr de Autoritât consolâr taliane che al ateste che ni il von ni i dissendents in linie direte, comprendût chel che lu domande, a àn mai rinunziât ae citadinance taliane;
- Certificât di residence.
L’Ufici di Stât civîl, une volte verificât il dirit al ricognossiment, al larà indevant cu la trascrizion dai ats di stât civîl relatîfs a chel che lu domande e al inzornarà i archivis anagrafics.
Normative di riferiment: Leç n. 92/1991, modificade de Leç n. 92/2009; Circolâr Ministeri dal Interni - Division Citadinance - K.28.1 dai 08/04/1991.
Tornâ a cuistâ la citadinance taliane
Il citadin che al vûl tornâ a vê la citadinance taliane pierdude par naturalizazion foreste al à di lâ tal Ufici citadinance par vê dutis lis informazions necessariis.
Si torne a cuistâ la citadinance dal dì dopo de sotscrizion de declarazion devant dal Uficiâl di Stât civîl.
Se l’interessât al è resident in Italie di plui di un an al torne a vê la citadinance cu la prime zornade dopo dal prin an di residence.
Normative di riferiment: Leç n. 92/1991, modificade de Leç n. 92/2009; D.P.R. n. 572/1993.