Ambient
Lis cundizions climatichis e lis carateristichis dal teritori
Lis cundizions climatichis dal teritori a son chês dal Medi Friûl cun pocjis precipitazions, di 1.300 a 1.400 milimetris ad an. Chês a van di un minim di cirche 70 milimetris tal mês di Zenâr fin a un massim di cirche 140-160 milimetris tai mês di Mai-Jugn e Otubar-Novembar. Dilunc de Vierte e di Istât a vegnin pal plui temporâi.
L’aiar sul teren al ven di Nord, Nord-Est o Est. Tal mês di Març e ven la bore ma di basse intensitât. Plui fuart invezit al è il siroc che, vignint dal mâr, al pues soflâ in ogni stagjon. La fumate e ven vonde da râr e dut câs di plui te part meridionâl dal teritori. La temperadure medie dal an e je di cirche 14°C, cun minimis tal mês di Zenâr tra i 0°C e 5°C e massimis tai mês di Lui-Avost tra i 25°C e i 33°C. Il teritori pal plui al è in plan.
La posizion dal teritori, logât cuasi dut sot de Stradalte, al à determinadis carateristichis. La linie des risultivis e je segnade propit de Stradalte. La diviersitât dai terens e je subit clare: parsore o vin gleriis e claps di grandis dimensions, disot arzilis e sediments plui fins. Cheste composizion si displee te origjin de planure furlane tal periodi dal Pleistocen; cheste e je formade di sediments fluviâi e glaciâi. Il disfâsi dai glaçârs che al à puartât a val claps, gleriis e tocs plui piçui al à formât la planure e i à dât un aspiet particolâr. Un di chei e je la sô diviersitât dade di moviments mecanics: al è clâr che il materiâl plui grant e pesant si ferme prime dal materiâl plui piçul. Su la base di cheste diviersitât si fâs la distinzion tra “alte planure” e “basse planure”.
Il teritori di Talmassons e des sôs frazions al è pe plui part te basse planure. Dome une piçule part, cirche un cuindicesim, al è logât te alte planure. Sot de linie des risultivis lis aghis de falde freatiche, pe plui part che a vegnin dal bacin dal Tiliment, a travanin tal teren de alte planure e a tornin in superficie par vie de conformazion dal teren, une vore impermeabil. Chestis aghis a crein une rêt idrografiche une vore ingredeade come la Roie Cusane, la Roie di Sant Antoni (Riul Comugne), la Roie Gran Levade, la Roie di Vuirc, par nomenâ dome chês plui grandis. Chestis roiis po a van a butâsi tal Stele, a sud dal teritori.
Lis tantis aghis che a segnin il teritori a àn simpri caraterizât il paisaç e a àn vût tal passât funzions sociâls e economichis impuartantonis. Chest ultin al è un altri aspiet fondamentâl di chestis aghis: di fat di agnorums si son simpri fats sù mulins. A jerin ancje une risierve alimentâr pe popolazion dal puest; si pues dome imagjinâ trop che al jere impuartant chest, consideradis lis cundizions economichis de int di chê volte.
Fin pôc timp indaûr lis feminis dal paîs a lavin su lis rois par lavâ la blancjarie e soredut i bleons. Al jere cuasi un rît, fat dôs o trê voltis ad an cuntun grant rigôr: si partive a buinore cul cjar, si passave dute la zornade parsore dai lavadôrs, si fermavisi dome pal gustâ, si tornave cul soreli lât a mont. Lis bonifichis fatis tal prin e secont dopovuere a àn modificât une vore chest intric di aghis: tancj a son stâts retificâts, cualchidun al è discomparît.